Primeiro ano do club de lectura... e xa non hai quen nos pare! 📚
Este curso 2025/26 naceu na nosa biblioteca o club de lectura «Letras no Illa», e queremos contarvos como foi a cousa. Aviso: acaba con boas noticias para o curso que vén.
Como funcionou?
Empezamos con moitas ideas (tiñamos ata cinco liñas temáticas pensadas!) e o propio alumnado foi decidindo o camiño. Ao final consolidáronse dous grupos: o club de Medo e Terror 👻 e o club de Ciencia Ficción 🚀. Reunímonos na biblioteca ao saír das clases, arredor das 14:00, cada grupo nunha semana distinta, con comida compartida incluída — porque falar de libros con algo que petiscar sempre sabe mellor.
E cando un tema nos interesaba a todas e todos, xuntabamos os dous clubs nunha sesión conxunta. Así naceron as nosas sesións sobre feminismo, que foron das máis animadas do curso.
Organizámonos por medio dun grupo de WhatsApp no que podes participar, xa somos máis de 30 no grupo, únete cando queiras!!!
Que lemos?
Pois nada menos que isto:
👻 No club de Medo e Terror:
• Selección de contos de Edgar Allan Poe
• Sempre vivimos no castelo e A maldición de Hill House, de Shirley Jackson
• O horror de Dunwich, de H. P. Lovecraft
🚀 No club de Ciencia Ficción:
• 1984, de George Orwell
• Cadáver exquisito, de Agustina Bazterrica
• El cuento de la criada, de Margaret Atwood
• La naranja mecánica, de Anthony Burgess
✋ Nas sesións conxuntas de feminismo:
• Los hombres me explican cosas, de Rebecca Solnit
• Panza de burro, de Andrea Abreu
• Comerás flores, de Lucía Solla Sobral 💙
• Punto de araña, de Nerea Pallares 💙
(Os corazonciños azuis son para as nosas autoras galegas, que lemos en galego, por suposto.)
Da man do club de lectura naceu tamén o Club de Cine 🎥, que foi todo un éxito: proxeccións abertas relacionadas coas nosas lecturas e, como colofón, unha saída aos cines Gran Vía para ver A princesa Mononoke de Hayao Miyazaki na pantalla grande.
Ademais, grazas ao Plan Social de ENCE e á colaboración da ANPA, o club conta agora con dez lectores electrónicos e un proxector novo. Ler en e-book tamén conta! 📱
📷 Podedes ver as fotos da entrega dos lectores electrónicos, das sesións do club e da saída ao cine no Instagram do centro:
Seguídenos para non perder nada!
O curso que vén... decides ti
Para o 2026/27 vimos con pilas novas e cambios que pediu o propio alumnado do club:
- Un único club con temática variada: as lecturas decidiranse por votación nas propias reunións. Terror, ciencia ficción, feminismo, manga... ti propós, ti votas.
- Un libro cada tres ou catro semanas, con máis calma para ler e comentar.
- Máis sesións conxuntas co Club de Cine: libro + película = plan redondo (xa estamos pensando en La naranja mecánica...).
- Queremos traer un encontro con autoría galega — e xa hai conversas en marcha. 🤫
- E na lista de desexos: unha saída á Expo Otaku da Coruña. 🇯🇵
Se este curso non te animaches, o que vén é o momento: non hai exame, non hai nota, só boas lecturas, boa compañía e algo de comer. As portas da biblioteca (e do club) están abertas para ti.
Vémonos en setembro nas «Letras no Illa»! ✨
